జపాన్‌లో పాటించే 7 ఆసక్తికరమైన అలవాట్లు
ప్రపంచంలో ప్రతి దేశానికీ తనకంటూ కొన్ని ప్రత్యేకమైన ఆచారాలు, పద్ధతులు ఉంటాయి. కానీ జపాన్‌ గురించి చెప్పుకోవాల్సి వస్తే, అక్కడి క్రమశిక్షణ, పరిశుభ్రత, నిశ్శబ్దం, ఇతరులను గౌరవించే తీరు ప్రత్యేకంగా కనిపిస్తాయి. అందుకే సరదాగా జపాన్‌ను “నో చెప్పే దేశం” అని కూడా అంటుంటారు. అక్కడ మనకు సాధారణంగా అనిపించే కొన్ని పనులకు కూడా "నో" అనే చెప్తారు. కొన్ని అలవాట్లను అక్కడి సంస్కృతి అంతగా ఆమోదించదు.
జపాన్‌ జీవనశైలిలోని ఏడు ప్రత్యేక అలవాట్లు తెలుసుకుంటే… “దేశం అభివృద్ధి చెందడం అంటే కేవలం మౌలిక వసతులు పెరగడం కాదు, ప్రజల ప్రవర్తనలో బాధ్యత పెరగడం కూడా” అనే విషయం మనకు స్పష్టమవుతుంది.
1. రెస్టారెంట్‌ లేదా హోటల్‌లో మంచి సేవ అందించినప్పుడు టిప్‌ ఇవ్వడం మనకు సాధారణం. అయితే జపాన్‌లో మాత్రం టిప్‌ ఇవ్వడం సాధారణ సంస్కృతి కాదు. అక్కడ మంచి సేవ అందించడం ఉద్యోగ బాధ్యతలో భాగంగానే భావిస్తారు. అందుకే సేవకు ప్రతిఫలంగా అదనంగా డబ్బు ఇవ్వడం కంటే, తమ పనిని నిబద్ధతతో, శ్రద్ధగా చేయడాన్నే గౌరవంగా భావించే సంస్కృతి జపాన్‌లో కనిపిస్తుంది. మంచి సేవ అందించినందుకు ప్రత్యేకంగా టిప్‌ ఇవ్వాల్సిన అవసరం సాధారణంగా ఉండదు.
2. ప్రజా రవాణాలో ఇతరులకు ఇబ్బంది కలగకుండా నిశ్శబ్దంగా ఉండటానికి ఎంతో ప్రాధాన్యత ఇస్తారు. రైలు లేదా బస్సులో ఫోన్‌ను సైలెంట్‌లో పెట్టుకోవడం అక్కడ సాధారణ పద్ధతి. ప్రయాణ సమయంలో ఫోన్ కాల్స్‌ మాట్లాడటం లేదా గట్టిగా మాట్లాడటం ఇతర ప్రయాణికులకు అసౌకర్యం కలిగిస్తుందని భావిస్తారు. అందుకే తమ చుట్టూ ఉన్నవారి ప్రశాంతతను గౌరవించడం అక్కడి సామాజిక సంస్కృతిలో ముఖ్యమైన భాగంగా కనిపిస్తుంది.
3. రోడ్డుపై నడుచుకుంటూ తినడం సాధారణంగా అంతగా ప్రోత్సహించరు. తినే సమయంలో ఒకచోట ఆగి, ప్రశాంతంగా ఆహారం తీసుకోవడమే మంచిదనే భావన అక్కడ కనిపిస్తుంది. తాము తినే ఆహారం వల్ల చుట్టుపక్కల వారికి ఇబ్బంది కలగకూడదన్న ఆలోచనకు అక్కడి సంస్కృతిలో ప్రాధాన్యత ఉంటుంది. అందుకే తినే విషయంలో కూడా ఇతరులను ఇబ్బంది పెట్టకుండా ఉండటాన్ని గౌరవంగా భావిస్తారు.
4. జపాన్‌లో ఆశ్చర్యం కలిగించే విషయాల్లో ఇది కూడా ఒకటి. చాలా ప్రాంతాల్లో మనం సాధారణంగా చూసేంతగా చెత్త బుట్టలు కనిపించవు. అయినప్పటికీ అక్కడి వీధులు ఎంతో పరిశుభ్రంగా ఉంటాయి. చెత్త బుట్ట కనిపించకపోతే చెత్తను రోడ్డుపై పడేయకుండా, తమతోనే తీసుకెళ్లడం అక్కడి ప్రజల్లో కనిపించే అలవాటు. అవసరమైతే గంటల తరబడి తమ చెత్తను వెంట తీసుకెళ్లినా, బహిరంగ ప్రదేశాల్లో పడేయకుండా ఉండటానికి ప్రాధాన్యత ఇస్తారు.
5. రోడ్డుపై లేదా ఇతర బహిరంగ ప్రదేశాల్లో ముద్దులు పెట్టుకోవడం, హత్తుకోవడం వంటి ప్రేమ ప్రదర్శనలు జపాన్‌లో సాధారణంగా అంతగా కనిపించవు. వ్యక్తిగత భావాలను అందరి ముందూ బహిరంగంగా ప్రదర్శించకుండా, కొంత సంయమనంతో వ్యవహరించడం అక్కడి సామాజిక ప్రవర్తనలో సాధారణంగా కనిపిస్తుంది. అంటే ప్రేమను చూపించకూడదని కాదు. వ్యక్తిగత భావాలను వ్యక్తిగతంగానే ఉంచుకోవడం అక్కడి సంస్కృతిలో ఎక్కువగా కనిపిస్తుంది.
6. జపాన్‌లో ఇంట్లోకి చెప్పులతో వెళ్లడం మర్యాదలేని పనిగా భావిస్తారు. ఇంటి బయట ఉన్న మురికి లోపలికి రాకుండా ఉండేందుకు, ప్రవేశ ద్వారం దగ్గరే చెప్పులు విప్పి లోపలికి వెళ్లడం అక్కడ సాధారణ పద్ధతి. ఇళ్లలోనే కాకుండా కొన్ని దేవాలయాలు, రెస్టారెంట్లు వంటి ప్రదేశాల్లో కూడా చెప్పులు బయటే విడిచి లోపలికి వెళ్లాల్సి ఉంటుంది. చాలాచోట్ల లోపల వేసుకోవడానికి ప్రత్యేకమైన స్లిప్పర్లు కూడా అందుబాటులో ఉంటాయి.
7. జపాన్‌లో లిఫ్టులోకి ఎక్కగానే మరో ఆసక్తికరమైన విషయం గమనించవచ్చు. తలుపులు మూసుకున్న వెంటనే చాలామంది నిశ్శబ్దంగా ఉంటారు. పక్కన స్నేహితులు ఉన్నా కూడా గట్టిగా మాట్లాడకుండా, ఇతర ప్రయాణికులకు ఇబ్బంది కలగకుండా ఉండటాన్ని మర్యాదగా భావిస్తారు. కొన్ని నిమిషాల లిఫ్ట్ ప్రయాణమే అయినా. ఇతరుల ప్రశాంతతను గౌరవించడం అక్కడి సంస్కృతిలో భాగం.
క్రమశిక్షణే జపాన్‌ ప్రత్యేకత
ఈ నియమాలను కేవలం ఒక దేశంలో పాటించే నిబంధనలుగా చూడటం కంటే, వాటి వెనుక ఉన్న ఆలోచనను అర్థం చేసుకోవడం చాలా ముఖ్యం.
“నేను చేసే పని వల్ల పక్కవాళ్లకు ఇబ్బంది కలగకూడదు” అనే సామాజిక బాధ్యత జపాన్‌ సంస్కృతిలో బలంగా కనిపిస్తుంది.
అందుకే టిప్‌ ఇవ్వకపోవడం, రైల్లో ఫోన్ మాట్లాడకపోవడం, చెత్తను ఎక్కడపడితే అక్కడ వేయకపోవడం, చెప్పులు బయట విడిచి లోపలికి వెళ్లడం వంటి చిన్న చిన్న అలవాట్ల ద్వారా కూడా క్రమశిక్షణ, పరిశుభ్రత, ఇతరుల పట్ల గౌరవాన్ని పాటించేందుకు ప్రాధాన్యత ఇస్తారు.
మనకు “నో” అనిపించే ఈ చిన్న చిన్న అలవాట్ల వెనుక నిజానికి చాలా పెద్ద అర్థం ఉంది.
వ్యాసకర్త
కోట దామోదర్
మొబైల్ 9391480475
