హృదయాలను కదిలించిన చిన్నారి సరిగమప లిటిల్ ఛాంప్స్ "వరుణవి"

 హృదయాలను కదిలించిన చిన్నారి

సరిగమప లిటిల్ ఛాంప్స్  "వరుణవి"

ప్రపంచంలో తల్లిని మించిన యోధురాలు లేరు అనే మాట నిజమని చక్కగా సాక్ష్యపరచిన ఉదాహరణ జీ తెలుగు ఛానల్‌లో శని, ఆదివారాల్లో ప్రసారమవుతున్న ‘సరిగమప లిటిల్ ఛాంప్స్’ కార్యక్రమం ద్వారా మన ముందుకు వచ్చింది.

చిన్నారి వరుణవి, అంధురాలైనప్పటికీ, ఆమె పాడే పాటలు వినగానే చెవుల్లో అమృతం పోసినట్టుగా మృదుమధురంగా అనిపిస్తాయి. కోయిల స్వరాన్ని తలపించే ఆ గానం, ఆమె సహజమైన హాస్య పటిమ కలిసి ప్రేక్షకులను మంత్రముగ్ధులను చేస్తాయి. వరుణవి ప్రతిభను చూసిన ప్రతి ఒక్కరి మనసులో
“ఇంత చిన్న అమ్మాయికి ఇంత పరిణతి ఎలా సాధ్యమైంది?”
అనే ఆశ్చర్యం తప్పక కలుగుతుంది.

ఈ చిన్నారి వెనుక నిలిచిన నిజమైన యోధురాలు ఆమె తల్లి మౌనిక. తన బిడ్డను సద్బుద్ధిగా, అపారమైన ప్రేమతో, అచంచలమైన శ్రద్ధతో పెంచిన ఆమె తీరు ప్రతి ఒక్కరినీ ఆశ్చర్యపరుస్తుంది. ఆ త్యాగం, ధైర్యం, దృఢత్వం మనసును తాకే స్ఫూర్తిదాయక ఉదాహరణగా నిలుస్తుంది.

“ఒక తల్లి బిడ్డను కనాలంటే యుద్ధం చేస్తుంది;
కానీ ఆ బిడ్డను సరిగా పెంచాలంటే ప్రతిరోజూ యుద్ధం చేయాల్సి ఉంటుంది.”

ఈ మాటలు తల్లి ప్రేమలోని త్యాగం, పట్టుదల, ధైర్యాన్ని అద్దం పడతాయి. అంధురాలైన వరుణవిని పెంచడం అంటే నిజంగా ప్రతిరోజూ ఒక యుద్ధమే.

ఈ షోలో వరుణవిని చూసిన ప్రతి ఒక్కరి కళ్లలో కంటతడి రాక తప్పదు. ఆమె ప్రతిభను, స్వరాన్ని, హాస్యాన్ని చూసి
“పాపం… దేవుడు ఈ అమ్మాయికి కళ్ళు ఇస్తే ఎంత బాగుండేది”
అనే భావన ప్రతి హృదయాన్ని తాకుతుంది.

ఈ కార్యక్రమానికి యాంకర్‌గా సుడిగాలి సుధీర్, జడ్జీలుగా SP శైలజ, అనిల్ రావిపూడి, అనంత్ శ్రీరామ్ వ్యవహరిస్తున్నారు. వరుణవితో వారి సంభాషణలు షోకే ప్రత్యేక ఆకర్షణ. శైలజ గారిని “అమ్మమ్మ”, సుధీర్, అనిల్, శ్రీరామ్ గారిని “మామ” అని ఆప్యాయంగా పిలుస్తూ,
“బెండకాయ్, దొండకాయ్… నువ్వే నా గుండెకాయ్”
అని చెప్పే మాటలు నవ్వులు పూయిస్తాయి.

ఒక రోజు షో మధ్యలో శైలజ గారు, వరుణవి మాటలకు ముగ్ధులై
“నిన్ను మా ఇంటికి చెన్నై తీసుకెళ్తా” అని అనగా,
వరుణవి వెంటనే
“నాతో ఆడుకోవడానికి ఎవరున్నారు? ఎక్కడ?”
అని అడిగింది.

“చెన్నై దగ్గర పెద్ద సముద్రం ఉంది” అని శైలజ గారు చెప్పగానే,
చిట్టితల్లి అడిగిన ప్రశ్న—
“సముద్రం ఎలా ఉంటుంది?”

ఆ ఒక్క ప్రశ్న అక్కడున్న ప్రతి హృదయాన్ని కదిలించింది. కళ్ళు కనిపించని చిన్నారి సముద్రాన్ని ఊహించాలనుకున్న ఆ క్షణంలో, శైలజ గారి కళ్లలోనే కాదు… ప్రేక్షకుల కళ్లలోనూ కన్నీళ్లు నిండిపోయాయి.

సుధీర్–వరుణవి మధ్య జరిగిన ఒక సంభాషణలో సుధీర్ భావోద్వేగంతో వేసిన ప్రశ్నకు… దేవుడికైనా సమాధానం ఉందా? అనిపిస్తుంది.

ఒకప్పుడు పూర్వజన్మ పాపాల గురించి చెప్పారు.
ఇప్పుడు ఈ జన్మ పాపాల గురించి అంటున్నారు.
అయితే—
ఇంత చిన్న వయసులో వరుణవి ఏ పాపం చేసింది?
ఆ దేవుడు ఎందుకు ఈ చిన్నారికి ఇంతటి శిక్ష విధించాడు?

అనే ప్రశ్నతో సుధీర్ దేవుడినే ప్రశ్నించిన ఆ క్షణం…
మాటలు ఆగిపోయాయి…
మౌనం మిగిలింది…
కంటతడి నిశ్శబ్దంగా జారిపోయింది.

ఈ కార్యక్రమాన్ని యావత్ ఉమ్మడి తెలుగు రాష్ట్రాల ప్రజలు, వరుణవి–సుధీర్ సంభాషణల కోసమే కాదు, ఆమె మధుర గానాల కోసమూ ఆసక్తిగా వీక్షిస్తున్నారు.

హాస్య నటుడిగా మాత్రమే తెలిసిన సుధీర్‌లోని మల్టీ టాలెంట్ ఈ కార్యక్రమం ద్వారా అందరికీ స్పష్టంగా అర్థమవుతోంది. ఒక సందర్భంలో వరుణవి
“సుధీర్ మామ… నాకోసం ఒక పాట పాడు”
అనగా ఆయన పాడిన
“నా అమ్మ నీవేలే… నీ బొమ్మ నేనేలే”
పాట ప్రతి గుండెను కదిలించింది.

ఇంకొక సందర్భంలో వరుణవి
“అనిల్ మామ… నన్ను చిరంజీవి మామ దగ్గరకు తీసుకెళ్తావా?”
అని కోరగా, వెంటనే చిరంజీవి గారిని కలిసే ఏర్పాటు చేయడం హృదయాలను తాకింది.

చిరంజీవి గారు ఆమెను చూసి
“నిన్ను చూస్తుంటే అచ్చం నెమలి లాగా ఉన్నావు”
అని అనగా, వరుణవి చెప్పిన మాట—
“రికార్డుల్లో మీ సినిమా ఉండదు… మీ సినిమా మీదనే రికార్డ్స్ ఉంటాయి!”

ఆ చిన్నారి తెలివితేటలు, ఆత్మవిశ్వాసం చూసి చప్పట్లతో వేదిక మార్మోగింది. చిన్నారి మాటలకు ముగ్ధుడైన చిరంజీవి గారు, ఆమెకు కళ్ళు వచ్చేలా తన వంతు సహాయం చేస్తానని మాట ఇవ్వడం యావత్ తెలుగు అభిమానులను గర్వంతో నింపింది.

ఈ కార్యక్రమానికి ముందే సుధీర్ చెప్పిన మాటలు మరో నిజాన్ని వెల్లడించాయి—
వరుణవికి ఇది సమస్య అని ఆమె పుట్టినప్పటి నుంచి తల్లిదండ్రులు ఎప్పుడూ చెప్పలేదని, ఇది లోపమే కాదని భావింపజేస్తూ ఆమెను పెంచారని.

ఇక్కడ మనం గ్రహించాల్సిన సత్యం ఒక్కటే
వైకల్యం లోపం కాదు; దానిని లోపంగా భావింపజేయడమే అసలు సమస్య.
వరుణవిని అలా పెంచిన తల్లిదండ్రుల దృక్పథమే ఆమె ఆత్మవిశ్వాసానికి, ప్రతిభకు పునాది అయింది.

వ్యాసకర్త
కోట దామోదర్
మొబైల్ : 9391480475