ఆమె జడలో ఒదిగిన మల్లెలు

ఆమె జడలో ఒదిగిన మల్లెలు కురులకే అందం.. 
ఆ మల్లెలు సుగంధ పరిమళాలను వెదజల్లుతుంటే,
అందరి చూపులు ఆమెవైపే మళ్ళినా…
ఆ ఆకర్షణ మాత్రం ఆ మల్లెల మాధుర్యానికే.

ఆమె అందం కన్నులను ఆకర్షిస్తుందేమో గానీ,
మల్లెల పరిమళం మాత్రం మనసులను మైమరపిస్తుంది.
రూపం నయనానందకరంగా  రంజింపజేస్తుంది,
పరిమళం మదిలో మధుర జ్ఞాపకంగా నిలుస్తుంది.

ఆమె అడుగుల సవ్వడి వినకముందే మల్లెల మాధుర్యమే ఆమె రాకను ప్రకటిస్తుంది.
ఆమె పలకరింపుకుముందే పూల పరిమళమే హృదయాన్ని హత్తుకుంటుంది.

అందుకే…
ఆమె జడలో విరిసిన ఆ మల్లెలు,
ఆమె సోయగానికి ప్రకృతి అందించిన సుగంధ పరిమళాలు.

కన్నులు రూపాన్ని వెతుకుతాయి…
హృదయం మాత్రం పరిమళాన్ని వెతుకుతుంది.
అందం కాలగర్భంలో కలిసిపోవచ్చు, కానీ పరిమళం మాత్రం
జ్ఞాపకాల గుండెల్లో నిత్యవసంతమై నిశ్శబ్దంగా వికసిస్తూనే ఉంటుంది.


కోట దామోదర్
మొబైల్ 9391480475